كلمات اغنية رماد حلمك ..

كلمات الاغنية

وكان جَلدك وكان شنقك
على إيديهم
وبعد الشنق كان حرقك
وانا واقف ف وسطيهم

كأني حشرجة ف حَلْقك
بأراقب صمتي ف عنيهم

بأراقب عضمك المجنون
ف كف النار بيتكسّر

كأن الكون مالوهش عيون
يشوف بيهم ويتأثّر

أكيد صعب إني أكون بينهم
وأشوف حلمك قصاد عيني

رماد بارد على جبينهم
بُقع سودا على جبيني

غبار داكن
بينداس ف الدروب لكن
بيدبحني

وانا قلبي يا ابويا نجيب
هزيل عايش على الأكاذيب

تقيل الحِمل لما تغيب
وانا ضلي اتولد محني

مافيش قدامي غير موتك
بيندهلي بحنان قاسي

بلملم ف الظلام صوتك
واشيلُه ف حُضن أنفاسي

غبار داكن
بينداس ف الدروب لكن
بيدبحني

وانا قلبي يا ابويا نجيب
هزيل عايش على الأكاذيب

تقيل الحِمل لما تغيب
وانا ضلي اتولد محني