بالصور.. أفكار مبتكرة ممكن تعمليها بالتي شيرت القديم

بالصور.. أفكار مبتكرة ممكن تعمليها بالتي شيرت القديم

النهارده هنشوف مع بعض شوية أفكار سهلة وبسيطة ممكن تعمليها بأي تي شيرت قديم عندك، تابعيها معانا..

1- شراب لتدفئة الرجلين (Leg Warmer)
مفيش أحسن من إنك يكون عندك شراب طويل علشان يدفّي رجلك في أيام الشتاء الباردة، بخطوات بسيطة جدا ممكن تعملي Leg Warmer من التي شيرت قديم..

- قصّي الأكمام بتاعة التي شيرت بالمقص، وبعد كده قصّي الجزء العلوي منها علشان يبقى متساوي، زي ما هو واضح في الصورة رقم (2).

- هاتي تي شيرت تاني بلون مختلف يكون يليق مع لون الأكمام اللي قصّتيها، وقصّي من الأكمام بتاعته شريطتين متساويتين في الطول يكون عرضها 3 سم، بس راعي إن التي شيرت التاني تكون خامته مطاطة شوية (استرتش)، زي ما هو واضح في الصورة رقم (3).

- اثني الطرف العلوي من أكمام التي شيرت اللي قصّتيها في الخطوة الأولى، بعرض مناسب مع عرض الشرايط اللي قصّتيها، وخيطّيه زي ما هو واضح في الصورة رقم (4)، وبعد كده دخّلي الشرايط فيها (دكّكيها) وطلّعي طرف الشريط من الناحية التانية، واربطيهم مع بعض على شكل فيونكة.

2- اسكارف الشرائط

دلوقتي هنعمل اسكارف مميز جدا وشكله حلو وتقدري تلبسيه مع أي بادي أو بلوفر سادة، وخطواته سهلة وبسيطة أوي..

- قصّي الجزء العلوي من التي شيرت (اللي فيه الأكمام والرقبة)، وبعد كده خدي الجزء اللي باقي من التي شيرت، وقصيها على شكل شرائط بعرض 3 سم تقريبا، بس ما تقصّيهاش للآخر يعني، سيبي مسافة حوالي 3 سم من الطرف العلوي للجزء اللي بتقصّيه، زي ما هو واضح في الصورة رقم (3).

- بعد كده امسكي التي شيرت من الجزء غير المقصوص، وابدئي شدّي الشرائط اللي قصّتيها واحدة واحدة علشان تطول معاكي وكل ما تشدّيها أكتر هتلاحظي إن الشرائط ابتدت تلف حوالين نفسها وتديكي شكل مموج وجذاب.

3- الاسكارف المموج


دلوقتي هنعمل اسكارف تاني بطريقة مختلفة هتديكي نتيجة جميلة وشيك جدا..

- ارسمي 4 أو 6 دوائر على التي شيرت باستخدام أي طبق بلاستيك عندك بإنك تحدّدي مكانه بالقلم.

- قصّي مكان الدوائر دي بالمقص، وبكده هيكون عندك 8 أو 12 قطعة، وبعد كده خدي كل دايرة منهم، وقصّيها بالمقص على شكل زجزاج، بإنك تحركي المقص مع اتجاه الدايرة كذا مرة، زي ما هو واضح في الصورة رقم (3).

- بعد كده افردي اللفات دي من بعضها، وقسّمي الشرائط المموجة اللي هتحصلي عليها إلى مجموعتين بنفس العدد، وابدئي خيطيهم ببعض من عند الأطراف.

- وبكده تقدري تلبسي الاسكارف بالطريقة اللي إنتي عايزاها، إما إنك تحطّيه على رقبتك وتربطيه من عند الأطراف، أو بإنك تمسكي الطرفين ببعض بوردة أو بروش أو أي شريط بلون مختلف.

- ممكن تزيّني الاسكارف ببروش أو وردة من القماش بلون مختلف عن لون الاسكارف،

وممكن تعملي الوردة دي نفسها من أي شريطة تقصّيها من تي شيرت تاني وتبدئي تلفّيها حوالين نفسها

مع تثبيت اللفات بالصمغ وبعد كده خدي الوردة دي والزقيها على قطعة قماش تانية دائرية،

وبعدين ثبّتي الوردة على الاسكارف.

 

موضوع رائع وجميل
سلمت اناملك الذهبيه
ماننحرم من جديد طرحك
يعطيك العافيه ننتظر جديدك
ودي وتقديري