سر شعر الهنديات الحقيقي وابحاث عن الشعر موضوع غايه فالاهمية

عاوزين وصفات هنديه بجد

دي وصفات من ولايه كيرلا بالهند

اولا الزيوت المهمه اللي كاتبين عنها زيت جوز الهند ده شيئ اساسي
وزيت الخروع وزيت فول الصويا وزيت الزيتون

بس اللي فهمته انهم بيفضلو تسخين الزيت علشان يكون افضل واعتقد علشان يفتح المسامات
بس مش تسخين حتي الغليان طبعا لا تسخين بسيط

مكتوب ان ده الاسلوب في ولايه كيرلا تسخين الزيت وليس الغليان
واحيانا بيستخدمو حبات الذره او الارز في التسخين اول لما بتطفو عالسطح بتطفي النار

اول وصفه وصفه اوراق الكاري
اللي بتساعد علي التخلص من القشره وتحمي الشعر من التساقط
واوراق الكاري بتتغغل في فروه الشعر وتعززه وتحافظ عليه وهو نبات غني بالبروتينات
ودي صورته


طبعا هتقولولي نجيبها منين وازاي لونها اخضر والكاري اصفر شويه

هقولكم نسئل ويارب نلاقيها بالنسبه للونها الي بتشوفيه فالتوابل بيكون لونها كده علشان بتتخلط مع الكركم

المهم مكتوب طريقتين
طريقه للكسولين وطريقه تانيه افضل

طريقه السيده الكسوله
بتجيبي الزيت ويفضل زيت جوز الهند وتسخنيه وبعدين تضيفي ورقتين كاري ودقيقتين وتطفي وتسبيه يبرد
وتستخدميه ربع ساعه عالشعر مع التدليك وبعدين تاخدي شاور
او ممكن تستخدميه كزيت عادي بدون غسيل
ولو الجو حار مش بيتسخن الزيت
ممكن تدفي بس
ومش بيتحط في التلاجه

الطريقه الافضل
بتجيبي اوراق الكاري تغسليها كويس وتسبيها فالشمس

وبعد كده تنشف بطتحنيها
وتحطيها عالنار وتضيفي في ساعتها الزيت عليها
بتدفيه شويه وتستخدميها

دي طريقه الكاري


الطريقه التانيه ازهار و اوراق الكركديه

الكركديه عندهم شيئ اساسي في تغذيه الشعر ومساعده علي نموه ومنع القشره والتساقط
وكمان بيعملو شامبو بيه

دي الزهره


ودي لما تتاخد الكركديه قبل ما ينشف

المشكله ان الوصفه لازم تكون بالزهره مش عارفه ينفع نستخدمها بالكركديه العادي بتاعنا ولا لاء
ومعلومه كمان الكاركديه فوايده لا تعد
وكمان بيتاخد اللون الطبيعي بتاعه بيتصنع منه مستحضرات تجميل ويدخل في صناعه الادويه
لانه لون طبيعي مش صناعي
وبيتصنع منه شامبوهات مفيده جدا


المهم نكمل الوصفه

بتجيبي 5 زهرات وتضربيهم فالخلاط مش لازم توصليهم انهم يكونو عجينه
وتجيبي الزيت المفضل ليكي وبيرشحو جوز الهند وتدفيهم علي النار

وبرضو بتستخدميه بنفس الطريقه السابقه


في وصفه تانيه وهي نبات التولسيبرضو مع الزيت بنفس الطرق السابقه
بس للاسف مش معروف هنا
بتستخدم لو
الفروه فيها دمامل او جروح او التهابات


وفي وصفه تانيه مفيده جدا برضو
ا كوب زيت جوز هند
1 كوب حليب جوز الهند الي هو الميه اللي بتكون في جوز الهند لما تتفتح
مسحوق الالوفيرا

ومسحوقين تانين للاسف مش معروفين التولسي والبرهومي
برضو بتدفيهم وتستخدميها

كمان في وصفه زيت زيتون وبتقول لو حاسه انه تقيل استخدمي نوع اخف

بتجيبي 3 معالق زيت زيتون معلقه عسل وتدلكي فروه الراس

واحده تانيه بتجيبي 3 معالق زيت زيتون و ليمونه وتدلكي الراس

واحده تالته 3 معالق زيت زيتون ومعلقه خل وتدلكي الراس

واعتقد اخر اتنين دول للقشره


جزء من بحث


انك تضيفي الشاي المغلي لماء الاستحمام هيضيف لشعرك الحيويه واللمعان

وتستخدمي صفار بيضه وقليل من الحبه السوده اللي هي حبه البركه والسمسم

لتساعد علي نمو الشعر
وبعدها تغسلي الشعر بماء دافيء مش سخن اوي تستخدميها مره في الاسبوع

حاجه تانيه تساعد علي نمو الشعر
تعمليها كل يومين

مزيج من التوت الاسود والبيض وزيت السمسم

بالاضافه ان زيت اللوز مفيد جدا للشعر بصفه عامه

وهناك طرق غير مباشره تساهم في نمو الشعر وهي الغذاء الصحي المتوزان
وشرب المياه والنوم الكافي والخضروات والفواكه الطازجه
بالاضافه ان التدخين يؤثر سلبا علي اطاله الشعر
ويجب ان تبتعدي عن التوتر والضغوط النفسيه

وكمان تئكيد ان فرشاه الشعر لها علاقه وثيقه في نمو شعرك
لازم تكون مناسبه مع شعرك


يعني المجمل اللي نطلع بيه من الموضوع

الناس دي كل اعتمادها علي الغذاء الصحي والطبيعه من زيوتها ونباتتها

ابسط الحجات معاهم بتجيب نتايج لان البنيه الاساسيه من الغذاء والفيتامينات موجوده

حتي ابسط الحجات اللي قريتها انهم لما بيستخدمو حمام زيت بيستخدمو فوطتين دافين
يشيلو واحده يحطو التانيه علي طول

مش زينا لازم سشوار او بونيه حراري
لا حجات بسيطه جدا ونتايجها زي ما بتشوفوهم

معظم اللي قريته كاتبين الغذاء الصحي شرب الميه النوم الكافي
مش بيصبغو شعرهم ولا يفردو
هاتولي فتوكه عمرها ما صبغت ولا فردت غير قله قليله

بجد يا جماعه لكل حلم خطه ولو الخطه بتاعتك محكمه هتوصلي للي انتي عاوزاه واكتر بأمر الله

يعني مش بكتر الوصفات علي الشعر
لازم الاول تهتمي داخليا قبل خارجيا

ولازم تتئكدي ان الوصفه دي مناسبه مع شعرك ولا لاء

واخيرا وليس اخرا

في مقوله بتقول حبي عيبك الناس تحبه
لو حاسه ان شعرك في كل العبر
حبيه علشان يحبك والناس تحبه

مجرد ضغط اعصابك ان شعرك مش مريحك ده في حد ذاته هيسببلك تساقط ومشاكل

اعترفي ان الطبيعه هي الافضل

شعر طبيعي بدون صبغه ولا فرد علي طبيعه ربنا مع الاعتناء والغذاء الصحي
هيكون احسن من شعر مفرود والفرد حارقه ومصبوغ ومقصف من التقصيف

تستفيدي ايه بلون شعر مقصفلك نص شعرك وفرد مقصف النص التاني ؟

اتمني اكون افدتكم

 

تسلمى ياقمر عالافاده
شكراا لكى
تحياتى