البوس البوس

البوس البوس



البوس في سياق الصحوبية ..


قديما جدا كان المكان الشرعي للبوس غرفة النوم أو ما يعرف ببوس ما بعد الزواج أو أفلام سهير رمزي وناهد شريف ونجلاء فتحي وحتى فاتن حمامة اتباست، ولكن حاليا لا تستبعد أن ترى الكل "بيبوس" وانت واقف لا بيك ولا عليك، وأصبح البوس كما يقول بعض الفنانين في إطار الدراما أو بمعنى أدق في إطار الصحوبية، يعني من حق الواد على البت بتاعته أن يبوس وكأن الشرع محلله.. ومع أن الحديث عن البوس أمر شائك فإن ممارسته أمر شائع من وانت نونو لحد ما تبقى راجل عجوز، الكل بيبوس وبيتباس. ولذلك قررنا أن نفتح ملف البوس وأنواعه وقبل أن تذهب "دماغك لبعيد" ولو كنت راسم على قلة أدب مش هتلاقي يا خفيف .. إحنا موقع مؤدب.


بوس ماما وبابا:


وهذا النوع من "البوس" قديم جدا؛ فمنذ ولادة الطفل تجد الأم "شغالة اموا اموا اموا ومش سايبه البيبي في حاله"، وكلما زاد بكائك كلما ازداد معدل "البوس"، مع العلم إنه قد يكون السبب الأساسي في البكاء أصلا، وأنت كطفل لا تستطيع أن توصل لها معلومة إنك زهقت من أم البوس بتاعها ده، أما بابا فقليلا ما يستغلك وأنت طفل صغير، وخاصة لو كان عنده شنب لأنه لازم يراعي إن شنبه هيشوكك.



بوس النونو:


أي واحد شحط كبير يلاقي نونو شكله حلو تلاقيه نزل فيه بوس من غير رحمة ولا شفقة كأنه بينتقم من كبت البوس اللي عنده. بس أول بوسة حقيقية موجهه لبنت غالبا بتبقى بنت الجيران، وانت شاب يافع عندك ييجي 3 سنين لما ماما تقولك بوس النونو دي فتلطع سيادتك انت البوسه على خدها وانت مسرور القلب.



الثلاث بوسات القاتله:


الطبيعي أن الناس بتبوس بوستين، ولما يكونوا كرما قوي بتبقى أربع بوسات، أما منتهى السخافة البنات اللي بتبوس 3 بوسات لأنك في الغالب بتبقى عامل حسابك على بوستين ولما تديكي التالته فتيجي انتي تديها الرابعة .. فتلاقيها وقفت ومكملتش.



بوس المحلسة:


غالبا ما تكون هذه القبلة من الموظف لرئيسه ليستطيع أن "يقفش أي مصلحة"، أو من الموظف الكبير لآي واحد غلبان، ودي بتنتشر جدا في أوقات الانتخابات في عهد ما قبل 25 يناير على طريقة بوسة من بقة في فيلم طيور الظلام بتاع عادل امام.



أبوس رجلك:


"أبوس القدم وأبدي الندم"، دي غالبا بتبقى لما واحد يعمل مصيبة كبيرة يعني يتقفش في وضع مخل في حديقة الأسماك، أو مدمن عاوز الجرعة كما نشاهدها في أفلام "الست نادية الجندي".



أبوس إيدك:


دي كلمة تطلع من واحد شحات أو ممكن يكون واحد أصيل قوي لأن بوس الإيد بيعبر عن نوع من الولاء أو واحد جنتل مان وابن ناس بيبوس إيد واحدة، وده نوع انقرض من البوس من أساسه.



بوس الواوا:


أشهر أغنيات البوس على الإطلاق. يعني زمان كان الواحد يحط ميكركروم على الواوا يروح لدكتور علشان الواوا لكن دلوقتي اقعد جنب ميلودي وخلى هيفاء تنفعك.



البوس في الأوهام الشعبية: بلاش تبوسني في عنيه:


تشير الأوهام الشعبية إلى أن بوس العين نذير فراق، وقد عبر عن ذلك محمد عبد الوهاب في أغنيته في فيلم (ممنوع الحب) حين غنّى: بلاش تبوسني في عينيَّ .. دي البوسة في العين تفرَّق، يمكن في يوم ترجع إليَّ والقـلب حلمـه يتحقّـقّ ..خلّي الوداع من غير قبل .. علشان يكون عندي أمـل وبلاش تبوسني في عينيَّ.



ومن الأوهام الشعبية السائدة في الغرب ما يلي:



- إذا عطست يوم الثلاثاء فإنك ستقبّل شخصاً غريباً.
- إذا تمكنت من تقبيل مرفقك فإن جنسك سيتغير.
- إذا أصبت بحكّة في الأنف فإن أحد البلهاء سيقبّلك.
- إذا تبادل رجل واقف القبلات مع امرأة جالسة فإنهما سيتشاجران.
- إذا أردت أن يذهب عنك ألم الأسنان فقبّل حماراً في خديه.
- إذا سقط من يديك كتاب أو قطعة خبز على الأرض فعليك رفع كل منهما وتقبيلهما احتراماً للكلمة والنعمة حتى لا تتعرض لا تزول من وجهك. (وهذا الصنيع شائع في بعض البلاد العربية والإسلامية ولاسيما حين يكون الكتاب مقدساً).